ນ້ອງອາດຈະມີ ເພດສໍາພັນ ອີກ ເປັນຄັ້ງທີ່ ສອງ !

ນ້ອງ​ອາດຈະມີ​ ເພດ​ສໍາພັນ ອີກ​ ເປັນ​ຄັ້ງ​ທີ່ ສອງ  !

    ຫຼາຍ​ຄົນ​ເວົ້າ​ວ່າ “ເພດສໍາພັນ” ເປັນເລື່ອງບໍ່ຄວນເວົ້າໃນໜ້າວາລະສານ” ແຕ່ຜູ້ຂຽນຄິດວ່າ ເຖີງເວລາແລ້ວທີ່ຈະເວົ້າເລື່ອງນີ້ ໂດຍສະເພາະ ກັບໄວໜຸ່ມຍິງສາວທັງຫຼາຍທີ່ໂທເຂົ້າມາສົນທະນາ,ສ່ວນຫຼາຍຈະເປັນ ເລື່ອງຂອງການ ໄດ້ເສຍໃຫ້ກັນ ແຕ່ອາຍຸນ້ອຍ 16-17 ປີ ( ຫຼື ຕໍ່າກວ່ານັ້ນ)  

ມີ​ນ້ອງ​ບາງ​ຄົນບອກວ່າ ມັນເກີດຂື້ນແບບບັງເອີນບໍ່ຕັ້ງໃຈ… ນ້ອງບາງຄົນ ໂທເຂົ້າມາສົນທະນາ ເລື່ອງ ບັນຫາຊີວິດ ທີ່ເກີດມາຈາກ ຄວາມຮັກ ແຕ່ສຸດທ້າຍ ຄວາມຮັກນັ້ນ  ກໍ່ກ່ຽວພັນເຖີງການມີເພດສໍາພັນ…. ນີ້ເປັນເຫດຜົນໜື່ງທີ່ ຜູ້ຂຽນເອງ ມີຄວາມຈໍາເປັນຈະຕ້ອງຍົກເອົາ ເລື່ອງຂອງ “ເພດສໍາພັນ” ມາລົງໃນໜ້າ​ວາລະສານ

   “ນ້ອງ ເຄີຍໄດ້ເສຍ ໃຫ້ກັບ ແຟນ ຜູ້ທີ່ນ້ອງຮັກ ຈົນ ລົ້ນອົກລົ້ນໃຈ ແຕ່ ຫຼັງຈາກນັ້ນ ເຂົາກໍ່ຫ່າງເຫີນໄປ . . . ”

ນ້ອງສາວ “ S ” (ນາມສົມມຸດ ) ອາຍຸ 17 ປີ ຍັງເປັນນັກຮຽນ ໂທມາສົນທະນາກັບຜູ້ຂຽນ ດ້ວຍນໍ້າສຽງອັນແຜ່ວເບົາ ກ່ຽວກັບ ເລື່ອງຂອງແຟນ ທີ່ ນັບມື້ນັບຫ່າງເຫີນ ຫຼັງຈາກການໄດ້ເສຍໃຫ້ກັນ . . . ນ້ອງ“S” ຕັ້ງຄໍາຖາມວ່າ:

“ ເປັນຫຍັງ ? ເຂົາຈື່ງປ່ຽນ ໄປ ? ແມ່ນແຕ່ໂທລະສັບຫາກໍ່ເປັນເລື່ອງຍາກທີ່ເຂົາຈະຮັບ  ”

ໃນໄລຍະທີ່ນ້ອງ  “S” ກໍາລັງ ຫງວມເຫົງາເສົ້າລະທົມ !   ບັງເອີນ ແຟນເກົ່າ ທີ່ນ້ອງ“S” ທີ່ໄດ້ເລີກກັນມາ​ເປັນ​ເວລາດົນນານ  ​ໄດ້ກັບມາຂໍຄືນດີ…  

                                   “ຈະເຮັດແນວໃດ?”  

ຜູ້ຂຽນໄດ້ສົນທະນາກັບນ້ອງ “S” ແບບ ກົງໄປກົງມາ ເພາະ ຊີວິດ ນ້ອງ ມັນຊ່າງ ອີ່ມເອີບ ໄປດ້ວຍຄວາມຮັກແບບ “ລົ້ນຈໍ” ​“ຜູ້ເກົ່າ ໄປ ຜູ້ໃໝ່ມາ ” ແຕກຕ່າງກັບນ້ອງໆ ບາງຄົນ ທີ່ຂາດຮັກ ບໍ່ມີແມ່ນແຕ່ຊາຍທີ່ຈະຫຼຽວແລ ! ຖ້າແບ່ງປັນໄດ້ ຜູ້ຂຽນເອງ ກໍ່ຢາກຈະແບ່ງ​ແຟນຂອງ​ນ້ອງ “S” ໃຫ້ກັບຜູ້ທີ່ ບໍ່ເຄີຍ ມີຄວາມຮັກ ( ເວົ້າຢອກເດີ)   

ຄວາມຮັກ ກັບການມີເພດສໍາພັນ ມັນ ເປັນສີ່ງ ຄູ່ກັນ …ໂດຍສະເພາະ ແມ່ນຄວາມຮັກທີ່ເກີດຂື້ນກັບໄວໜຸ່ມສາວ ຂື້ນ

ໃໝ່ ໃຈຈະຫຼວດ … ກ່ອນການມີເພດສໍາພັນ ສ່ວນຫຼາຍຜູ້ຊາຍ ຈະເປັນຜູ້ເອົາໃຈຜູ້ຍິງ ແຕ່ຫຼັງການມີເພດສໍາພັນ ຜູ້ຍິງຈະເປັນ ຜູ້ທີ່ ເອົາໃຈຜູ້ຊາຍຫຼາຍກວ່າ…  ຜູ້ຊາຍເກືອບທຸກຄົນ  “ ກິນແລ້ວແຊ່ວໜີ ! ” 

​​ໃນ​ກໍລະນີ​ຂອງຜູ້ຊາຍທີ່ມີຄວາມຮັກ ຄວາມຈິງໃຈກັບຜູ້ຍິງແທ້ໆ ເຂົາຈະເກິດມີຄວາມໝັ້ນໃຈວ່າ “ ມີເພດສໍາພັນແລ້ວ ” ຜູ້ຍິງຈະບໍ່ກ້າໜີໄປໃສ ແລະ ນາງຈະຕ້ອງ ຮັກເຂົາຜູ້ດຽວ ເວົ້າງ່າຍ ໆ ການມີເພດສໍາພັນຈະເປັນການຜູກມັດຜູ້ຍິງທີ່ຕົນເອງຮັກ​ໃຫ້ຢູ່​ຄາ​ມື… ​ແມ່ນ​ແຕ່ ຜູ້​ຊາຍ​ດີໆ​ທີ່​ບໍ່​ຄຶດ ລອກ​ລວງ​ຜູ້ຍິງ ​ເຂົາ​ກໍ່​ຍັງ​ມີ​ການ​ປ່ຽນ​ແປງ ​ເຊັ່ນຈະມີອາລົມດີຂື້ນ . . .ມີອິດສະລະ …ແລະບໍ່ຕ້ອງເອົາໃຈ ເກີນໄປດັ່ງທີ່ປະຕິບັດມາ …

 ສະນັ້ນ ມັນກໍ່ເປັນເລື່ອງທີ່ທໍາມະດາ ທີ່ຜູ້ຊາຍທີ່ນ້ອງ“S” ຮັກ ແລະ ມອບກາຍ-ໃຈໃຫ້ເຂົາຈະຕ້ອງມີການປ່ຽນແປງຫຼັງຈາກ ການມີເພດສໍາພັນ … ນີ້ ແມ່ນຄວາມເປັນຈິງຂອງຜູ້ຊາຍ ທີ່ ນ້ອງ  “S” ຄວນສຶກສາ​…

ສໍາລັບແຟນເກົ່າທີ່ຈະຄືນກັບມາຫານ້ອງ “S” ນ້ອງກໍຄວນລະວັງ ເພາະນ້ອງມີບົດຮຽນ ມາແລ້ວ ! ການມີເພດສໍາພັນ ຂອງນ້ອງຄັ້ງທໍາອິດທີ່ເກີດຂື້ນ ມັນອາດຈະເຮັດໃຫ້ນ້ອງມີຈິດໃຈອ່ອນໂຍນ, ບໍ່ມີຫຼັກໝັ້ນ ມີ​ໂອກາດ​ທີ່​ຈະ​ເຜີ​ຕົວ​ເຮັດ​ໃຫ້ການມີເພດສໍາພັນ ເກີດຂື້ນອີກ ເປັນຄັ້ງທີ ສອງ ! ທີ່ສາມ !  ແລະ ຕິດຕາມມາ ຫຼາຍ​ຄັ້ງ…

ນ້ອງ“S” ອາຍຸພຽງ 17 ປີ ຍັງເປັນນັກຮຽນ ຖ້າ ປ່ອຍໃຫ້ເຫດເການ ເກີດຂື້ນຄືແນວນັ້ນ ມັນຈະເຮັດໃຫ້ນ້ອງ ໄດ້ຮັບຜົນກະທົບ ທາງດ້ານຮ່າງກາຍ ແລະ ຈິດໃຈ ແລະ ຈະເປັນຜົນກະທົບຕໍ່ການຮຽນ ທີ່ເປັນອະນາຄົດຂອງນ້ອງ ດັ່ງນັ້ນ ນ້ອງຄວນຕັດໄຟ ແຕ່ຕົ້ນລົມ ບໍ່ຄວນຈະປ່ອຍໃຫ້ແຟນເກົ່າ ມາພົວພັນ ໃນຖານະຂອງແຟນ . . .

ແຟນເກົ່າ ແລະ ໃໝ່ ລວມທັງ ການມີ​ເພດ​ສໍາພັນ ທີ່ເກີດຂື້ນ… ທຸກຢ່າງ ມັນເປັນບົດຮຽນ ອັນສໍາຄັນ ສໍາລັບນ້ອງ.​. . ນ້ອງຕ້ອງເດັດຂາດ ເຂັ້ມແຂງ ສະກັດກັ້ນ ບໍ່ໃຫ້ມັນ ມາໃກ້ຕົວນ້ອງ ອີກ  ! ນັ້ນ ຈະ​ເປັນ​ສີ່​ງທີ່​ດີ​ທີ​ສຸດ ສໍາລັບ​ຊີວິດ​ຂອງ​ນ້ອງ​ໃນ​ຕໍ່ໜ້າ

ສະບັບໜ້າພໍ້ກັນໃໝ່