ໃນສະບັບກ່ອນໆ ຜູ້ຂຽນເຄີຍໄດ້ຮັບສາຍໄວໜຸ່ມຊາຍ ຖາມເລື່ອງ “ມີສະເໜ່ໃສ່ຜູ້ຍີງດີບໍ່ ? … ມາໃນເທື່ອນີ້ ແມ່ນມີໄວໜຸ່ມໂທມາສົນທະນາເລື່ອງ ຢາກມີແຟນ ແຕ່ລົມສາວຜູ້ໃດກໍ່ບໍຕິດ “ຈະລົມສາວແນວໃດຈະເຮັດໃຫ້ຜູ້ສາວຕິດ ?”
ປະກົດວ່າ ໄວໜຸ່ມຊາຍຫຼາຍຄົນ ມີຄວາມ ສົນໃຈ ເລື່ອງນີ້ ຫຼາຍຂື້ນ ສະແດງວ່າ ຜູ້ຂຽນຈະຕ້ອງໄດ້ຮຽນຂຽນຕໍາລາລົມສາວ, ຫຼືຕໍາລາເຮັດແນວໃດຈະໃຫ້ຜູ້ຊາຍຫຼົງໄຫຼ, ຟັງໆເບີ່ງ ຖ້າພິມຕໍາລານີ້ ອອກມາ ຄືຊິໄດ້ຂາຍ ແບບເທ່ນໍ້າເທທາ ແຮະ ແຮະ !!!
ນ້ອງ D ນາມສົມມຸດ ອາຍຸ 22 ປີ “ແອັປ” (Whatsapp) ມາສົນທະນາ ບອກວ່າ ຮອດອາຍຸສໍ່ານີ້ ນ້ອງຍັງບໍ່ທັນມີແຟນ ຄືໝູ່ …ລົມສາວໃດ ເຂົາກໍ່ບໍ່ຢາກເປັນແຟນ, ປັດຈຸບັນນີ້ ຮູ້ສຶກ ໂດດດ່ຽວ ຫງວມເຫງົາ ..ຢ້ານເປັນໂລກຊຶ່ມເສົ້າ
ນ້ອງ D ບອກຜູ້ຂຽນເອງວ່າ ອາດຈະເປັນຍ້ອນຮູບຮ່າງໜ້າຕາຂອງນ້ອງ ຂີ້ຮ້າຍ ດັ່ງນັ້ນຜູ້ສາວຈື່ງບໍ່ສົນໃຈ …ນ້ອງ D ໄດ້ສົ່ງຮູບຂອງນ້ອງໃຫ້ຜູ້ຂຽນເບີ່ງ …ຜູ້ຂຽນສັງເກດແລ້ວ, ຂໍເຫັນດີຕໍ່ການຕີລາຄາຕົນເອງຂອງນ້ອງ ເນີ!!
ໃບໜ້າ ຂອງນ້ອງຕາມເຫັນໃນຮູບ ນ້ອງມີໜ້າຕາ ຄ້າຍຄື ຄົນມົງໂກລີ, ໜ້າແຂງໆ, ໂດຍສະເພາະແມ່ນຕາ ແລະ ໂນກແກ້ມລົງມາຫາຄາງມີລັກສະນະແຂງ ແລະ ນ້ອງຍັງຈົ່ງໜວດເປັນມະຍອມມະແຍມ (ຄືນວດແມວ ອີກຕື່ມ)… ຖ້າຕົວຈີງນ້ອງ ເປັນແບບທີ່ເຫັນໃນຮູບ ຄຶດວ່າ ຊອກຫາ ຈຸດໂດດເດັ່ນຍາກຫຼາຍ ທີ່ຈະດຶງດູດຜູ້ຍິງ ( ຫຼື ຕົວຈີງ ນ້ອງຈະດີກວ່າ ໃນຮູບ )
ນ້ອງ D ບອກວ່າ ນ້ອງເປັນຄົນຕະລົກເຮຮາ ຜູ້ຍິງຄົນໃດ ໄດ້ລົມ ກໍໄດ້ຫົວນໍາ ແລະ ຢາກໃຫ້ລົມເລື່ອງຕະລົກໃຫ້ຟັງເລື້ອຍໆ …ປັດຈຸບັນນ້ອງສົນໃຈຜູ້ຍິງຄົນໜື່ງ ຮຽນຢູ່ໂຮງຮຽນດຽວກັນນີ້ລະ !!! ຄຶດວ່າການຕະລົກເຮຮາ ຂອງນ້ອງຈະຊ່ວຍເປັນການສ້າງສະພານໃຫ້ ນ້ອງໄດ້ຮັບຄວາມຮັກແບບເປັນແຟນກັບຜູ້ຍີງຄົນນີ້ ..ແຕ່ສຸດທ້າຍກໍ່ຖືກລາວປະຕິເສດ… ຜູ້ຍີງທີ່ນ້ອງ ລົມ ສ່ວນຫຼາຍມັກ ປະຕິເສດ ແນວນີ້ ມາຕະຫຼອດ
ນ້ອງ D ບອກວ່າ ນ້ອງ ເປັນຄົນຕະລົກ ເຮຮາມ່ວນຊືນ ມັກເປັນຜູ້ຊວນໂອ້ຊວນລົມ ແຕ່ ກໍ່ສະເພາະແຕ່ ຜູ້ທີ່ນ້ອງຄຸ້ນເຄີຍເທົ່ານັ້ນ ສໍາລັບຄົນອື່ນທີ່ນ້ອງບໍ່ຮູ້ຈັກ ນ້ອງກໍ່ມິດ ປານຄົນປາກກຶກ ພຸ້ນລະ !! ຜູ້ຍິງກໍ່ຄືກັນ ນ້ອງ ຈະລົມແຕ່ຜູ້ທີ່ນ້ອງຄຸ້ນເຄີຍ ແລະ ຜູ້ທີ່ນ້ອງສົນໃຈ ແຕ່ສໍາລັບຜູ້ຍິງຄົນອື່ນ ຈະບໍ່ລົມນໍາ
ເອົາລະ !!ຂອບໃຈ ນ້ອງ D ທີ່ “ແອັປ” ເຂົ້າມາຫາ ແລະເລົ່າເລື່ອງ ຄວາມເປັນຈີງໃຫ້ຟັງ ແລະ ບອກວ່າ ຢ້ານຕົນເອງເປັນໂລກຊື່ມເສົ້າ ຍ້ອນບໍ່ມີຜູ້ຍິງສົນໃຈ … ໃນຄວາມເປັນຈີງແລ້ວ ຄວາມຊືມເສົ້າ ບໍ່ແມ່ນເກີດມາຈາກຍ້ອນບໍ່ມີຜູ້ຍີງສົນໃຈເທົ່ານັ້ນ, ການທີ່ເຮົາເລືອກຄົນ ຫຼື ແບ່ງແຍກ ລະຫວ່າງຜູ້ ທີ່ເຮົາ ຄຸ້ນເຄີຍແລະບໍ່ຄຸ້ນເຄີຍ ນີ້ກໍເປັນຈຸດໜື່ງທີ່ ເຮັດໃຫ້ນ້ອງໂດດດ່ຽວ … ໃນຄວາມເປັນຈິງ ທຸກຄົນ ແມ່ນຕ້ອງການໝູ່ເພື່ອນ,ໂດຍສະເພາະແມ່ນໃນເວລາເຈັບເປັນ ຫຼືມີບັນຫາ ດັ່ງນັ້ນ ການທີ່ເຮົາ ຈະສ້າງຄວາມຄຸ້ນເຄີຍ ກັບຫຼາຍຄົນຈະເປັນການດີທີ່ສຸດ .ຢ່າງໜ້ອຍສຸດ ແມ່ນໃນເວລາ ເຮົາຊືມເສົ້າ ແລະ ເຮົາເອງກໍ່ຈະບໍ່ມີຊີວິດແບບຊໍ້າຊາກ ແລະ ການຮູ້ຈັກຄົນຫຼາຍໆຄົນຍັງເຮັດໃຫ້ເຮົາ ສາມາດ ພົບຜູ້ຍີງ ໃນຫຼາຍຮູບແບບ ຫຼາຍລັກສະນະ ແລະ ແນວຄິດ … ຍ້ອນນ້ອງເລືອກຜູ້ຍີງ ເພື່ອຄົບຫາເປັນແຟນ ນັ້ນເອງຈື່ງເຮັດໃຫ້ນ້ອງຖືກແຕ່ຄົນປະຕິເສດ
ຜູ້ຂຽນມັກເວົ້າເລື້ອຍໆວ່າ “ເຮົາບໍ່ຄວນຈະຮູ້ຈັກ ກັບຄົນທີ່ເຮົາຮັກ ພຽງຢ່າງດຽວ,ເຮົາຄວນຮູ້ຈັກກັບຄົນທີ່ເຮົາບໍ່ຮັກ ເພາະ ຄົນທີ່ເຮົາບໍ່ຮັກ ເຂົາອາດຈະຮັກເຮົາ” … ດັ່ງນັ້ນ, ຜູ້ຍີງອາດຈະບໍ່ສົນໃຈໜ້າຕາຮູບຮ່າງນ້ອງ ແຕ່ ເຂົາສົນໃຈ ຄໍາເວົ້າ ນີໄສ ມັກມ່ວນຕະລົກເຮຮາ ຂອງນ້ອງ ..ນ້ອງມີຈຸດນີ້ເປັນຈຸດເດັ່ນ ແຕ່ນ້ອງສໍ່າພັດ ມີຄວາມຈໍາກັດ ໃນການ ເຂົ້າຫາຄົນ ..ນ້ອງຄວນປ່ຽນແປງຈຸດນີ້ …ບາງເທື່ອ ນ້ອງອາດຈະຄືດວ່າ ບໍ່ຢາກລົມກັບຜູ້ຍີິງຄົນນີ້ ຍ້ອນບໍ່ເຄີຍຮູ້ຈັກກັນ ຫຼື ຄຶດວ່າ ຜູ້ຍີງຄົນນີ້ ອາດ ຈະບໍ່ສົນໃຈ ກໍ່ ເລີຍບໍ່ລົມ …ແຕ່ໃນຄວາມເປັນຈິງບາງ ເທື່ອ ລາວອາດຈະສົນໃຈນ້ອງກໍ່ມີ
ດັ່ງນັ້ນ , ສະເໜ່ ອັນໜື່ງຂອງຜູ້ຊາຍ ທີ່ມີໜ້າຕາ ຄືກັບນ້ອງ D ຄວນ ຈະເປີດປະຕູ ໃຫ້ຕົນເອງຮູ້ຈັກກັບຄົນຫຼາຍຂື້ນ , ບໍ່ຄວນ ປິດປະຕູ ໃຫ້ຊີວິດ ຕົນເອງແຄບລົງ ຖ້າຊີວິດແຄບລົງ ແນ່ ນອນ ການຊອກຫາຜູ້ຍີງທີ່ຈະເປັນຄົນຮັກ ກໍ່ຍີ່ງ ໜ້ອຍລົງ ແລະ ພົບແຕ່ ຜູ້ ປະຕິເສດ ແລ້ວ ນ້ອງກໍ່ຮູ້ສຶກຜິດຫັວງ ..ນັ່ງຊື່ມເສົ້າ ແລ້ວ ຄຶດຢ້ານຕົນ ເອງກາຍເປັນໂລກຊື່ມເສົ້າ …ນ້ອງຕ້ອງປ່ຽນຕົນເອງ ໃຫ້ໄດ້
ທົດລອງເບີ່ງ ເນີ !!ເປັນແນວໃດ ໃຫ້ແອປ ຫຼື ໂທມາອີກ
